පකිස්ථානයේ වයඹදිග තෙල් පාලක ප්රදේශයක් වන ඛයිබර් පක්තුන්ක්වා (KP) පළාතේ ඩෙරා ඉස්මයිල් ඛාන් දිස්ත්රික්කයේ පැවැති විවාහ මංගල උත්සවයකට එල්ල වූ මරාගෙන මැරෙන බෝම්බ ප්රහාරයකින් අවම වශයෙන් පුද්ගලයන් හත් දෙනෙකු මියගොස් තවත් දස දෙනෙකුට වැඩි පිරිසක් තුවාල ලබා ඇති බව එරට මාධ්ය වාර්තා කරයි. පසුගිය සිකුරාදා රාත්රියේ මෙම ප්රහාරය එල්ල වී ඇත්තේ රජයට හිතවාදී සන්නද්ධ කණ්ඩායමක් වන ‘අමන්’ සාම කමිටුවේ ප්රධානී නූර් අලාම් මෙහ්සුඩ්ගේ නිවසේ උත්සවය පැවැත්වෙමින් තිබියදී වන අතර, මෙම පිපිරීමෙන් ඔහු ද තුවාල ලබා ඇති බව සඳහන් වේ.
අමුත්තන් සංගීතයට නර්තනයේ යෙදී සිටි අවස්ථාවේදී එල්ල වූ මෙම ප්රහාරයෙන් ගොඩනැගිල්ලේ වහලය කඩා වැටී ඇති අතර, සුන්බුන්වලට යට වූවන් මුදාගැනීම සඳහා සහන කණ්ඩායම් දැඩි වෙහෙසක් දරා තිබේ. ප්රහාරයෙන් පසුව සන්නද්ධ පිරිසක් වෙඩි තැබීම් සිදුකර ඇති අතර, බෝම්බකරුගේ වයස අවුරුදු 17ක පමණ තරුණයෙකු බවට පොලිසිය සැක කරයි. මියගිය පිරිස අතර සාම කමිටුවේ ප්රමුඛ සාමාජිකයෙකු වන වහීදුල්ලා මෙහ්සුඩ් නොහොත් ජිග්රි මෙහ්සුඩ් ද වන බව තහවුරු වී ඇති අතර තුවාල ලැබූවන් කඩිනමින් දිස්ත්රික් ප්රධාන රෝහල වෙත ඇතුළත් කිරීමට පියවර ගෙන ඇත.
ඛයිබර් පක්තුන්ක්වා මහ ඇමති සොහේල් අෆ්රිඩි මෙම සිදුවීම දැඩි ලෙස හෙළා දකිමින්, මේ සම්බන්ධයෙන් වහාම පරීක්ෂණයක් පවත්වා වාර්තාවක් ඉදිරිපත් කරන ලෙස පළාත් පොලිස් ප්රධානියාට නියෝග කර තිබේ. මෙම ප්රහාරයේ වගකීම මෙතෙක් කිසිදු කණ්ඩායමක් භාරගෙන නොමැති වුවද, ඇෆ්ගන් දේශසීමා ආසන්නයේ ක්රියාත්මක වන තෙහ්රීක්-ඊ-තාලිබාන් පකිස්ථාන් (TTP) සංවිධානය කෙරෙහි ආරක්ෂක අංශවල දැඩි සැකය යොමුවී ඇත. සාම කමිටු සාමාජිකයන් රාජ්ය ද්රෝහීන් ලෙස සලකන එම සංවිධානය මීට පෙර ද අවස්ථා කිහිපයකදීම නූර් අලාම් මෙහ්සුඩ් ඉලක්ක කර ප්රහාර එල්ල කර තිබුණ ද ඒවා ව්යර්ථ කිරීමට ආරක්ෂක අංශ සමත් විය.
පකිස්ථානය තුළ පවතින ප්රචණ්ඩත්වය පසුගිය වසරේදී සියයට 25කින් පමණ ඉහළ ගොස් ඇති බව දත්ත මගින් අනාවරණය වන අතර, ඉන් වැඩිම බලපෑමක් එල්ල වී ඇත්තේ ඛයිබර් පක්තුන්ක්වා පළාතටයි. ඇෆ්ගනිස්ථානයේ තාලිබාන් පාලනය පිහිටුවීමෙන් පසුව දේශසීමා ආශ්රිත සන්නද්ධ ක්රියාකාරකම් වර්ධනය වී ඇති පසුබිමක, පකිස්ථාන හමුදාව සන්නද්ධ කණ්ඩායම්වලට එරෙහිව දැවැන්ත මෙහෙයුම් සඳහා සූදානම් වෙමින් සිටී. මෙම අවාසනාවන්ත සිදුවීම වාර්තා වන්නේ මීට පෙර ද එම පළාතේම සාම කමිටු සාමාජිකයන් සහ පොලිස් නිලධාරීන් ඉලක්ක කර ගනිමින් මාරාන්තික ප්රහාර මාලාවක් එල්ල වී තිබූ වාතාවරණයක් තුළය.
